نــورألــحــٌسـَـيـن

الخميس يناير 08, 2009 10:35 pm

نــورألــحــٌسـَـيـن
شعر
نائل المظـّـفــّر

ما وصل شيعي أمس يدفن حُسين
و طلعت الأعراب سكته ودفنته
وهسه كل الناس تبجيله وتنوح
ومن شمال الصين وادم زارته
يالتزور حسين إصبر لا تزور
إقره ليش حسين قامت ثورته
حتى من تنزل دمعتك عالحُسين
تعرف شكَد الثواب بدمعته
تدري ليش الميت إيعصره الكـَبر؟
وتدري شيصيح الكـَبر في ميته؟
خاف حابس دمعة في حق الحُسين
اليوم تطلع من طرف سبابته
وحتى تعرف منك شرايد حُسين
مو تزوره وأنت جاهل غايته
حسين رايد روح تنحط بالضريح
مو تحط دينار ماهو بحاجته
روح علكـَ كـَلبك إبـّاب الحُسين
وشيل كل هذا الذهب من حضرته
حسين ما محتاج عا لكـَبة ذهب
الذهب محتاج راح إلكـَبته
والناس لو تدري الذهب قصد الحُسين
جان ما نصرت يزيد وخانته
وياهو كَال الشيعة فقدت جم حُسين
وياهو كَال هواي وادم تبعته
صاح صوت من السمه بمقتل حُسين
وبعده لسه يصيح محد سكته

من ذبحتوا حيسن بجيتوا الشمس
بس خيال حسين يشتم الهوى
ومن بجت عين الشمس ضوّة ظلام
وكلشي صار إخيال وحسين الضوى

أقنعتكم كلها طيحها الحُسين
الثورة ما خلـّت وجه ما كشفته
وحرتوا شتلّبسون سيدكم يزيد
وهسه كل الشيعه عرفت صورته
ومن فضحكم نور سيدنا الحُسين
سيوفكم للراس راحت كَصته
تالي حرتوا ما طفه راس الحُسين
وفوكـَ راس حسين ضوّت جثته
ومن فشلكم شلتوا راسه إعله الرماح
وكَلتوا راس حسين نزلت قيمته
ما تنزله رماحكم راس الحُسين
با لعكس عا لروس كلهن علته
ثبتت الكفار فوزك يا حُسين
وإشجره بصفين بالطف عادته
بس فرق شلـّت يزيد بكربلاء
ما لكَت قرآن راسك شالته
وبقت جثته حسين تضوي إعله التراب
وانتقل نور الحُسين بتربته
وهسٌه كلمن يسجد بتربة حُسين
تنزل الجنة تختمه بكَصته
وإنتوا بيكم بينّت شارت حُسين
وماعلينه شلون بيّن شارته
المهم فوزين فزنا إحنا بحُسين
فوز حبه وفوز فضل زيارته
الله يحسب حجة وحدة بكل سنة
للسبع مرات طايف كعبته
وإحنا لو رحنا مشي نزور الحُسين
نمشي كل خطوة تعادل حجته
وياهو كَال الشيعة ماعدها عَقِل
راحت إلنهر الفرات ولامته
لأن ملجومين نعتب عالفرات
إحنا ندري حسين ماهو بعازته
حسين لو رايد صدكـَ ماي الفرات
جان ماضّكّه العطش يم ضفته
جا وكَف كله الفرات بكربلاء
ودنكَ إعله حسين باسه بشفته
وجا روى العباس من فمه الشريف
وجا كَطع دابر يزيد وشلته
وجا ولا واحد شرب ماي السبيل
وجا تموت من العطش كل شيعته

حسين لو مامعتني ورايد يموت
جان ميّة باب فك إلعبرته
حسين مايكـَدر يفك باب الفرات
وموسى شكَ النيل شكَ بعصته
حسين أبو السجاد شايل ذوالفقار
يعني لو طكَ الفرات يشتته
وجان مايلظم سهم عنق الرضيع
وجان ما حنّا السمه بدم ركـَبته
وجان ماضل جون يضوي إعله التراب
ولا تعطرت كربلاء بريحته
ولا يتوب الحر على إيد الحسين
ولاثبت للناس فوزه بتوبته
وجان كله الدين طاح ويا الحسين
وما بقه العباس رافع رايته
راية العباس مارادت تطيح
لكن إنقطعت يساره ويمنته
وطاحت جفوف القمر فوك التراب
وطاحت الراية إعله جفه وباسته
باسته ورادت تمس خد التراب
كَام جفه إلوحّدّه وكض رايته
سيدي العانيته من شلة يزيد
فوكـَه عشر أضعاف زينب عانته
فوكـَ كـَبرك وكـَفت وصاحت حُسين
خويه ما قاسيت مختك قاسته
من طحت يحسين ماشفت الحُسين
شلون حدوات الحوافر داسته
وما شفت بشعّت ذبحتك من كـَفاك
والرماح شلون راسك شالته
وما شفتني شلون جروني اليهود
وإبنك السجاد حركَّـوا خيمته
وماشفت يحسين من يضحك يزيد
وعالرمح بالكاع راسك نبته

شلون مانبجي وندكـَ لاجل الحُسين
وكل سنة بعاشور ننصب مأتمه
إنكسر ظهر الكون من طاح الحسين
والجبال من اللطم متثلمه
ولأن ماكو جفوف وتدكَـ النجوم
تنهدكـَ عا لكَاع وترد للسمه
تدري شنهي المعجزة بلطم الحسين؟
ما تموت الناس لو تمطر دمه
ويه كل جف يرتفع يوكَف مَلاك
شما يدكـَ الشيعي صدره يقدمه
وعدنا با لشيعة زلم لولا الملاك
جا صدرها بضربة وحده تهشمه

روح للمذبح تلاحظ كل ذبيح
يلاوي بالكـَصاب من كـَد حركـَته
والذبيحة من نذرناها إلحُسين
لزمت الساطور هيّ وحدته
والماي يطفر من حضن حب السبيل
حتى يروي صدور ناس الشربته
والنار ماحركَت ضهر جدر الثواب
ثوب أسود عالحُسين إملبسته
ويبقى صابغنه السواد إعله الحسين
ونبقى للميعاد نذكر ثورته